Naresibi na kan Liga kan Barangay Pamplona President Dennis Tarusanan an total na ₱3.4 milyon na Presidential Assistance hale sa Malacañang na inilaan para sa 17 barangay kan banwaan.
Segun ki Tarusanan, na an lambang barangay makakaresibe nin ₱200,000. Sa nasabing kantidad, ₱100,000 an ipigtagama para sa scholarship assistance kan limang kwalipikadong college students na makakaresibi nin tig-₱20,000, mantang an natatadang ₱100,000 an gagamiton para sa mga prayoridad na proyekto kan lambang Barangay.
Dugang pa kan opisyal na sinunod ninda an mga itinakdang guidelines sa pagpili kan mga iskolar.
Kabali digdi an pagbilog nin Selection Committee sa lambang Barangay asin an pitong aldaw na pagpapaskil kan listahan kan mga napiling benepisyaryo tanganing matawan nin pagkakataon an publiko na magsumite nin ano man na pagtutol o paglilinaw.
Ipigheras man kaini na nag-agi muna an mga pondo sa lokal na Gobyerno basado sa umiiral na proseso bago ipigdistrebwir sa mga Barangay.
Pinaglalaoman na maipapadara na sa mga Barangay an opisyal na komunikasyon sa masunod na semana para sa awarding asin pagpapaluwas kan ayuda.
Nagpasalamat si Tarusanan ki President Ferdinand Marcos Jr. sa pagtao kan Presidential Assistance Program para sa mga Barangay.
Nagpasalamat man ini sa Sangguniang Bayan kan Pamplona sa padagos na pag-aprubar kan kinakaipuhan na resolusyon asin ki Mayor Manuel Agustin sa pagsuporta tanganing mapadali an pagproseso asin pagpapaluwas kan pondo.
Segun pa ki Tarusanan, dakulang tabang an programa sa pagsuporta sa pag-adal kan mga benepisyaryo asin sa implementasyon kan mahahalagang proyekto kan lambang Barangay para sa kapakinabangan kan saindang mga residentes.
