Tanging si Vice Presidente Sara Duterte asin an saiyang hepe sa seguridad na si Col. Raymund Dante Lachica an nakakaaram kun saen asin pano ginastos an P625 milyon na confidential funds kan Office of the Vice President (OVP).
Ini an inako ni OVP Assistant Secretary asin Assistant Chief of Staff Lemuel Ortonio sa impeachment trial kan Miyerkules. Mayo suboot siyang personal na kaaraman manungod sa aktuwal na pagluwas o paggastos nin ginatos na milyones pesos na confidential funds. “Mayo akong personal na kaaraman,” sabi ni Ortonio sa saiyang testimonya.
Kan hapoton ni Presiding Officer Francis Escudero kun aram ni Duterte kun pano ginastos an pondo, sinabi ni Ortonio na bilang pamayo kan OVP, dapat maaraman kan Bise Presidente kun papano ginibo an mga aktibidad na pinondohan hale sa confidential funds. “Sa paagi kan pagsabot ko, bilang pamayo kan ahensya, masasabutan ko na aram niya an implementasyon,” an simbag ni Ortonio.
Kinumpirmar man ni Ortonio na aram ni Lachica kun pano ginagamit an pondo huli ta siya an pamayo kan OVP security operations.
An paggamit kan confidential funds padagos na pighahapot poon kan maresibi kan OVP an enot na tranche na P125 milyones kan Disyembre 2022. Base sa records, an bilog na kantidad ginastos sa laog sana nin 11 aldaw—poon Disyembre 21-31.
