Magdadanay si dating Presidente Rodrigo Duterte sa saiyang detensyon sa The Hague matapos magdesisyon an Trial Chamber III kan International Criminal Court na mayo nin signipikanteng pagbabago sa mga sirkumstansya na magigin rason para sa saiyang pagluwas.
Iniluwas an desisyon pirang oras matapos an enot na personal na pagluwas ni Duterte sa ICC para sa ikatulong status conference kan saiyang kaso.
Segun sa mga trial judge, naglalangkaw an posibilidad na humarap si Duterte sa paglilitis asin, kun makondenar, sa halabang sentensya. Huli kaini, sinabi kan Chamber na igwa nin posibilidad na magdulag siya o manghimasok asin manggamit nin pagbabanta sa imbestigasyon asin mga proseso kan korte.
Idinugang man kan ICC na matapos isumite kan prosecution an lista kan mga testigo asin ebidensya, ipinahayag na an mga pagkakakilanlan kan mga testigo asin an inaasahang testimonya kan mga ini.
Segun sa Chamber, ini pwedeng makadugang sa posibilidad nin panghihimasok sa mga testigo, direkta man o sa paagi kan pamilya o mga tagasuporta ni Duterte sa Pilipinas.
Mientrastanto, dawa nakabinbin pa an desisyon sa saiyang fitness to stand trial, sinabi kan mga hukom na mayo nin bagong impormasyon sa mga report kan medical experts na supisyente tanganing ribayan an presenteng detensyon ni Duterte. Magdadanay siya sa ICC Detention Centre sa The Hague kun sain siya nakakulong poon kan siya arestaron.
