Nanawagan si Senador-Hukom Camille Villar nin respeto sa saiyang mga kapwa Senador matapos siyang magin emosyonal mantang tinutulan an pahayag ni Senador-Hukom Erwin Tulfo manungod sa mga senador-hukom na sa presente nakakulong asin dai nakakadalo sa impeachment trial.
Sa saiyang interpolasyon, iginiit ni Tulfo na dapat pag-adalan kun paano nakakaapekto sa komputasyon kan two-thirds vote an mga presenteng pangyayari, partikular an dai pag-ayon kan nagkapirang Senador sa impeachment trial.
Sinabi man ni Tulfo na posibleng dai naisip kan mga nagmukna kan 1987 Constitution an presenteng sitwasyon kun sain igwa nin mga senador na nakakahampang sa mga kasong arog kan plunder asin iba pang criminal charges.
Huli kaini, nagin emosyonal si Senador-Hukom Camille Villar asin idinepensa an saiyang mga kapwa senador-hukom na nakakulong.
Giit ni Villar, dai ninda pinili na dai magdalo sa trial asin dai pa sinda nahahatulan sa mga kasong kinakahampang.
Nanawagan si Villar sa saiyang mga kaibahan na likayan an personal na pag-atake asin manteniron an respeto sa lambang saro.
Aniya, dai dapat apodon na plunderer o magnanakaw an mga Senador na dai pa napapatunayan na nagkasala.
Sa saiyang sunod na manifestasyon, nilinaw man ni Senador-Hukom Tulfo na dai niya sinabi na convicted na an mga detained Senator-Judges.
Aniya, an tinutukoy niya iyo an mga Senador na “Charged with” kan nasambit na mga kaso asin bakong an mga nahatulan o convicted sa mga offense.
