Nag-apelar an Department of Education (DepEd) nin mas higot na pagbantay sa paggamit kan social media kan mga kahubinan, kasunod kan insidente nin pamamaril sa Banga National High School sa South Cotabato.
Segun ki Education Secretary Sonny Angara, ikinaugma kan ahensya an marikas na aksyon kan Department of Information and Communications Technology (DICT) laban sa mga online platform na posibleng ginagamit sa pagre-recruit asin pag-impluwensya sa mga menor de edad na maggibo nin karahasan.
Kaugnay kaini, nagtugot na an Reddit asin Discord na magtugdok nin mga opisina sa Pilipinas matapos an itinaong 24-oras na palugit kan Cybercrime Investigation and Coordinating Center (CICC).
Katuyuhan kaini na maparikas an koordinasyon kan mga online platform asin kan mga awtoridad sa pagresolber sa cybercrime asin iba pang huma sa internet.
Binigyang-doon ni Angara an importanteng papel kan mga magurang sa pagbantay sa online activities kan saindang mga aki tanganing malikayan na maimpluwensyahan an mga ini kan mga grupong nag-aagda nin karahasan.
Binanggit man kan kalihim an nagkapirang nasyon na naghihigot sa paggamit kan social media kan mga aki na may edad na hababa sa 15 o 16 na taon.
Iginiit ni Angara na dapat seguraduhon an kaligtasan kan mga estudyante bako sana sa laog kan eskwelahan kundi pati man sa mga digital platform.
Naroromdoman na nagkapirang insidente na nin karahasan sa mga eskwelahan an nairehistro ngunyan na taon, kun sain an iba kaini iniuugnay sa paggamit kan internet.
