Nangapudan an Naga City Police Office (NCPO) sa publiko na magdanay na marigmat, maingat asin responsable tanganing makatabang sa pagmantenir kan kaligtasan asin seguridad kan komunidad.
Sa ipinaluwas na pahayag ni PCOL Rizaldy L Caballero, Acting City Director, Naga City Police Office, sinaysay kaini na importante na maging alerto an mga namamanwaan sa saindang palibot, lalo na sa mga pampublikong lugar, asin i-safeguard an mga personal na gamit arog kan cellphone, wallet, kwarta asin iba pang mahalagang bagay.
Nagpagirumdom man an pulisya sa mga residente na siertohon na sarado asin nakakandado nin tama an mga pintuan asin bintana kan saindang mga harong. Inabisuhan an mga motorista na dae magwalat nin mga mahalagang gamit sa laog kan mga nakaparadang behikulo asin likayan an pagdisplay nin dakulang kantidad nin cash sa matawong lugar nganing mabawasan an posibilidad na magin biktima nin krimen.
Nagpaluwas man nin patanid an NCPO manungod sa mga phishing scheme asin iba pang online scam. Inapudan an publiko na dae mag-click sa mga kaduda-dudang links asin dae magtao nin password, PIN, OTP, account details asin iba pang sensitibong impormasyon sa mga dae awtorisadong tawo. Tinawan duon na dapat mag-ingat sa paggamit kan internet, social media asin online banking.
Pinagirumdom an mga motorista na magsunod sa mga ley sa trapiko, magsulot nin helmet asin seatbelt, asin likayan an paggamit nin cellphone mantang nagmamaneho. Inabisuhan man an publiko na likayan an paglakaw o pagduman sa madiklom asin mayong tawo na lugar asin kun pwede magpili nin mas ligtas asin matawong ruta.
Nangapudan si Caballero sa mga namamanwaan na tulos na isumbong sa pinakaharaning istasyon kan pulis o sa nanonongdan na awtoridad an anuman na kaduda-dudang aktibidad, insidente o pagprobar na pandadaya.
Segun ki Caballero, sa paagi kan pagigin alisto, maingat asin responsable, makakatabang an lambang saro na maibitaran an krimen asin mamantinir an katoninongan asin seguridad sa komunidad.
