Aprubado na kan House Committee on Energy an panukalang ley na an katuyuhan iyo an halion an “system loss charge” sa bayad sa kuryente.
Sa irarom kan nasabing panukala, tuyong dai na ipasa sa mga konsumidor an gastos na resulta kan “inefficiency” asin “non-technical losses” sa sistema kan distribusyon nin kuryente.
Dugang pa digdi, tuyo man kaining palawigon an paggamit nin sadiring “power generation system” sa mga harong.
Naroromdoman na nasambit ini ni Pangulong Ferdinand Marcos Jr. sa saiyang “State of the Nation Address” (SONA) bilang saro sa mga prayoridad na nangangaipo nin “legislative action” tanganing masimbagan an halangkaw na bayad sa kuryente sa nasyon.
Konektado digdi, nagbilog man an Department of Energy (DOE) nin sarong “inter-agency task force” tanganing maparikas an pagplano asin pagimplementar kan katuyuhan na ini.
Apwera digdi, aprubado man sa nasabing pagdangog an suway na panukalang “Sariling Kuryente Act.” Katuyuhan kaini na padalion an pagkaag asin paggamit nin “solar power” asin “energy storage systems” sa mga harong tanganing matabangan an mga namamanwaan na makatipid asin mabawasan an pagdepende sa “power grid.”
Kun maipasa asin magin ganap na ley, aamyendahan kan mga ini an Republic Act No. 9136 o an “Electric Power Industry Reform Act” (EPIRA).
