Sarong makusog na pagtutol an ipinahayag kan mga nangengenot na eksperto sa mental health asin youth development sa Pilipinas kontra sa panukalang ‘blanket ban’ sa paggamit kan social media para sa mga menor de edad.
Nagtipon an mga representante kan manlain-lain na mental health asin psychological associations, kaiba an mga espesyalista sa pag-uswag kan kabataan, kan Oktubre 15 sa sarong event venue sa Araneta City, Cubao.
An sentro kan saindang diskusyon iyo an delikadong isyu kan paggamit kan social media kan mga hoben, na nagresulta sa sarong kolektibong pagkontra sa suhestiyon na ipagbawal an social media sa mga Pilipinong hababa sa 18 anyos.
An pagtutol na ini nagbutwa kasunod kan panawagan ni Presidente Ferdinand Marcos Jr. na masusing pag-adalan an posibilidad kan pagbabawal sa paggamit kan social media kan mga menor de edad.
Minsan ngani inako kan mga eksperto na igwa nin mga peligro na kaakibat kan labi-labing exposure kan mga aki sa social media, iginigiit ninda na an sarong ‘blanket ban’ bakong sapat na solusyon tanganing matugunan an mga problemang ini.
Nagbabala an mga espesyalista na an siring na polisiya posibleng bakong akma sa scientific evidence asin pwedeng magdara pa nin mas dakol na problema sa mga kabataan.
Kaiba digdi an posibleng negatibong epekto sa saindang mental health asin an mas dakulang exposure sa online risks kun mawara an mga kontroladong plataporma.
Imbes na sarong ‘blanket ban’, irinekomenda kan grupo an pagpangataman kan presenteng age restriction sa social media para sa mga aki na hababa sa 13 anyos.
Kaiba digdi an pagpapatupad nin mas mahigot na safeguards, pagtao nin digital literacy programs, asin an mas epektibong pagpapatupad kan mga polisiya kan social media platforms.
An obheto kaini iyo na mas maprotektahan an mga kabataan online mantang tinutugunan an mga peligro kan social media sa paagi nin mas angkop asin ‘evidence-based’ na mga hakbang.
Sa paagi kan responsableng paggamit asin edukasyon, masisiguro na an social media magigin sarong kasangkapan para sa pag-uswag asin bakong peligro.
