Secretary Gilberto “Gibo” Teodoro Jr. kan Depensa, nagtao nin kasiguraduhan na ginigibo kan gobyerno an gabos na makakaya tanganing mapakusog an depensa kan nasyon sa ibong kan limitasyon sa pondo.
Sa pag-urulay manungod sa pagpreparar kan Armed Forces of the Philippines (AFP) sa territorial defense, ipinahayag ni Teodoro an 100 porsiyentong accomplishment kan militar, alagad idiniin na dai ini kayang mapagdanay sa halawig na panahon kun mayo nin supisyenteng reserbang kagamitan asin suplay para sa padagos na operasyon.
Idinugang kan kalihim na kaipuhan na iayon an mga operasyon militar sa kakayahan asin rekurso kan nasyon tanganing masiguro na magdadanay na andam an AFP na ipaglaban an teritoryo kan Pilipinas.
Dugang pa niya, importante na mapagdanay an supisyenteng reserba tanganing masuportahan an mga operasyon asin dai malagay sa peligro an halawig na kakayahan kan militar na gampanan an saiyang katungdan.
