Padagos an pagmonitor kan PAGASA sa posibleng epekto kan El Niño asin bagyong Champi sa Bicol Region, partikular na sa Camarines Sur asin Catanduanes, huli sa nairehistro na mas hababa kaysa sa normal na pag-uran asin huma nin makusog na duros asin alon.
Sa intrevista kan Bombo Radyo Naga ki Ian Nil Nunez, officer-in-charge kan PAGASA CBSUA Pili Agromet Station, ipinaliwanag na an epekto kan El Niño dai nangangahulugan sana nin mainit na panahon, kundi an mayor na indikasyon kaini iyo an mas hababang lebel kan pag-uran.
Segun ki Nunez, puon Mayo sagkod Oktubre 2026, mas hababa pa sa normal an nairehistrong pag-uran sa Bicol Region, dawa na makakaeksperyensiya pa ini nin makusog na pag-uran sa pagkahapon.
Idinagdag pa kaini na an mga posibleng epekto kaini kabali an paglangkaw kan temperatura, pag-kaatraso sa pag-abot kan tig-uran, asin mas halawig na dry period.
Mientrastanto, pigpapatanidan man an mga residentes sa posibleng epekto kan bagyong Champi, na babagohon an pangaran na Rosal paglaog na kaini sa Philippine Area of Responsibility.
Posible suboot na apektado kan Bicol Region kan trough o extension kan bagyo, siring man an makusog na duros asin alon. Kabali sa posibleng maapektaran iyo an Catanduanes asin norteng parte kan Camarines Sur, kun saen posibleng maiimponer an Tropical Cyclone Wind Signal No.1 depende sa opisyal na forecast kan PAGASA.
Segun ki Nunez, posibleng umabot nin tolong metros o labi pa an alon sa nagkapirang lugar kun kaya inaabisuhan an mga residente, urog na an mga nakaistar sa coastal areas asin mga parasira, na magdanay na vigilante.
Piglalaoman man an posibilidad nin localized thunderstorms asin pag-uran katakod kan eksistidong weather systems.
Sa rason na ini, inaabisuhan an publiko na padagos na magbantay sa mga opisyal na abiso kan PAGASA asin magsunod sa mga pagirumdom kan mga lokal na awtoridad tanganing magin andam sa posibleng epekto kan El Niño asin bagyong Champi.
