Nagkusog pa an binabantayan na Super Typhoon Rosal sa laog kan Philippine Area of Responsibility o PAR susog sa state weather bureau na DOST-PAGASA ngunyan na Miyerkules nin amay na aga.
Huring namasdan an mata kan Super Typhoon Rosal sa rayong 990 km sa subangan kan Northern Luzon kun sain igwa ini nin duros na 215 km/h asin igwa nin bugso na minaabot sa 265 kilometro kada oras.
Naghihiro an bagyo sa rikas na 30 km/h pasiring sa kanluran-silangan-kanlurana kun sain linalaoman ining magrani sa Extreme Northern Luzon sa Huwebes o Biyernes ngunyan na semana bago an linalaoman na tuluyang pagluwas kaini sa PAR sa Biyernes nin banggi o Sabado nin amay na aga.
Kasabay kaini, ipigtaas na an Tropical Cyclone Wind Signal no. 1 sa nagkapirang lugar sa Luzon arog kan Batanes, Babuyan Islands, kaiba an silangan asin kanluran na parte kan mainland Cagayan (Santa Ana, Gonzaga, Lal-lo, Santa Teresita, Camalaniugan, Aparri, Buguey, Gattaran, Bagao, Peñablanca, Santa Praxedes, Claveria, Sanchez-Mira, Pamplona, Ballesteros, Abulug, Allacapan).
Ipigtaas man an signal no. 1 sa hilagang-silangan na parte kan Isabela (Maconacon, Divilacan, Palanan, San Pablo, Cabagan, Delfin Albano, Santo Tomas, Santa Maria, Tumauini, Ilagan City, San Mariano, Dinapigue), kaiba an norte asin sentral na parte kan Apayao (Calanasan, Luna, Santa Marcela, Flora, Pudtol, Kabugao), pati na man an hilagang-silangan na parte kan Ilocos Norte (Pagudpud, Adams).
Ibinugtak man sa signal no. 1 an hilagang-silangan na parte kan isla nin Catanduanes (Pandan, Bagamanoc, Panganiban, Viga, asin Gigmoto).
Padagos man an pagtutok kan ahensya kan PAGASA sa super bagyo mantang pinag-iingat asin pinaghahanda an gabos manungod sa mga pag-uran na dara kaini sa nasyon.
