Magpapatupad an Metropolitan Manila Development Authority o MMDA, nin mga pagpugol sa trapiko asin nagkapirang pampublikong aktibidad bilang pagpreparar sa pag-host kan Pilipinas sa ika-49 na Association of Southeast Asian Nations o ASEAN Summit.
Poon Oktubre 24 sagkod Nobyembre 20, pansamantalang sususpindihon an pag-isyu nin permit para sa mga fun run, motorcade, prusisyon asin iba pang kaagid na pampublikong aktibidad sa Maynila, Pasay, Parañaque, Makati, asin Taguig.
Katuyuhan kaini na malikayan an dugang na pagsisikip kan trapiko mantang pigpreparar an mga lugar asin ruta na gagamiton para sa regional summit.
Poon Oktubre 24, ipapatupad man an bahagyang pagpugol sa Philippine International Convention Center o PICC asin sa Cultural Center of the Philippines Complex. Susundan ini nin full lockdown sa Nobyembre 7.
Mantang, ipapatupad an moratorium sa mga paghuhukay asin iba pang road works sa Metro Manila poon alas-12 nin matanga kan Nobyembre 1 sagkod alas-12 nin matanga kan Disyembre 23.
Sakop kaini an road reblocking, pagkaag nin mga tubo, road upgrading asin iba pang gibuhon na posibleng makaapekto sa daloy kan trapiko.
Sa pagtiripon kan MMDA, mga lokal na gobyerno asin iba pang ahensya kan gobyerno kan Oktubre 21, idinuhit an pangangaipo nin amay na pagpreparar asin mahigot na koordinasyon tanganing masiguro an kaligtasan kan publiko asin matanos na daloy kan mga sasakyan sa panahon kan duwang darakulang okasyon.
Piglalaoman na magpoon nang mag-abot sa nasyon an mga delegado para sa ASEAN Summit sa enot na semana kan Nobyembre.
