Nagdeklara an Korte Suprema (SC) na an Local Government Support Fund (LGSF) na nakalaag sa 2024 National Budget iyo unconstitutional huli saro ini sa mga “insertions” na nagpalobo sa unprogrammed funds.
An LGSF – na may alokasyon na P5 bilyon – saro sa 43ng aytem na binibilog nin “programs, activities, and projects/purposes” na nagkakantidad nin labi P303.1 bilyon na idinugang kan bicameral conference committee sa mga deliberasyon para sa 2024 nasyunal na badyet, susog sa mga rekord kan SC.
An 43ng bagong line items kaiba sa P449.5-bilyon na paglangkaw kan unprogrammed appropriations (UA) sa 2024 badyet, na pinawalang-saysay kan SC bilang unconstitutional huli sa paglampas kaini sa rekomendasyon kan National Expenditure Program o kan “President’s budget.”
Nagpatanid man an halangkaw na korte na dae dapat magkaigwa nin lump sums sa mga probisyon kan UA sa nasyunal na badyet.
Si SC Associate Justice Alfredo Benjamin Caguioa nag-uyon sa desisyon na isinurat ni Senior Associate Justice Marvic Leonen, asin pinunto pa an LGSF sa 2024 General Appropriations Act (GAA) bilang talagang unconstitutional.
Ikinomparar man ni Caguioa ini sa Priority Development Assistance Fund na pinawalang-saysay man kan halangkaw na korte,
Sinabi kan desisyon kan mayorya na an doctrine of operative fact an maaplikar, kun saen an mga proyekto sa irarom kan 2024 GAA ipinagpapalagay na naimplementar sa good faith.
Parehong kandidato sinda Leonen asin Caguioa na magribay ki outgoing Chief Justice Alexander Gesmundo sa sunod na bulan.
Dati nang idinepensa kan Malacañang an LGSF, na may alokasyon na P58.53 bilyon sa ipinapanukalang 2027 National Budget, na sinasabing pinakahalangkaw sa kasaysayan.
Dati nang sinabi ni Executive Secretary Ralph Recto na an LGSF an magpopondo sa mga programa arog kan libreng 10-kilo na bagas kada duwang bulan sa mga walong milyong pamilyang Filipino, farm-to-market roads, water systems, health facilities asin multipurpose buildings na nagsisirbing evacuation centers durante kan mga kalamidad.
