Nagtestigo si dating Department of Public Works and Highways (DPWH) Secretary Manuel Bonoan sa Sandiganbayan Fifth Division ngunyan na aldaw, manungod sa petisyon para sa piyansa ni Senador Jinggoy Estrada.
Sa saiyang testimonya, ibinunyag ni Bonoan na naghagad daa si Estrada nin mga proyekto na nagkakahalaga nin P1 bilyon tanganing maiba sa nasyunal na badyet, sa paagi ni dating DPWH Undersecretary Robert Bernardo.
Segun ki Bonoan, ipinapahiling an kahagadan para sa dugang na pondo huli sa posisyon kan senador bilang Senate President Pro Tempore asin ini konektado man daa sa sinasabing gastos sa eleksyon.
Maski P1 bilyon an hinagad na kantidad sa irarom kan Senate Leadership Fund, P700 milyon sana an opisyal na naaprubahan sa General Appropriations Act (GAA).
Kan haputon kan kampo kan depensa manungod sa saiyang kasiguraduhan, idiniin kan dating kalihim na mayo siyang rason na magduda huli harani na mag-amigo sinda Estrada asin Bernardo.
Nabatid na dating nagserbing district engineer sa Manila si Bernardo kan panahon kan pagtukaw kan ama kan senador na si dating Presidente Joseph Estrada bilang alkalde kan siyudad.
Sa ngonian, mayo pa nin simbag an kampo kan senador sa mga pahayag ni Bonoan sa atubangan kan mga mahistrado.
Naglalaom ini na matatawan nin pabor an kahagadan na makapaglagak nin piyansa tanganing makabalik sa trabaho sa Senado.
