Pigkokonsiderar na dakulang kapangganahan kan city government kan Naga na kabale ini sa mga ciudad na may pinakahalangkaw na ingreso sa Bicol Region, sa ibong kan limitadong lugar asin pasilidad kaini kumpara sa ibang ciudad.
Sa intrevista kan Bombo Radyo Naga ki Naga City Mayor Leni Robredo, dakulang bagay na halangkaw an ingreso kan Naga sa ibong kan pagkakaigwa sana nin 27 barangay asin kulang sa pasilidad arog kan seaport asin airport na yaon sa Ciudad nin Legazpi.
Segun ki Robredo, dae dapat maging rason an kapangganahan na ini para magin kampante an city government.
Imbes, sarong angat na orog pang mapakarhay an pagkolekta nin mga buwis asin babayadan, siring man an implementasyon kan mga eksistidong regulasyon sa mga negosyo.
Tinawan-duon kaini na igwang mga negosyo na kayang mag-operate na mayong business permit, na nagpapahiling kan pangangaipo na pakusugon an business mapping, monitoring asin revenue collection kan ciudad.
Huli kaini, pigtutulod kan lokal na gobyerno an pag-digitize kan mga transaksyon tanganing mabawasan an mga inefficiencies sa sistema, mapakarhay an pagkolekta asin mabantayan an mga dai nagsusunod na negosyo.
Sinabi pa kan alkalde nag-apply an ciudad nin pondo sa irarom kan FALGU asin para sa online digitalization system na piglalaoman na makakatabang sa pagparikas kan mga proseso sa mga opisina kan gobyerno.
Piglalaoman na sa paagi kan digitalization asin mas mahigot na monitoring, mas lalo pang mapagayon kan Ciudad nin Naga an pagkolekta nin ingreso asin masierto na nakokolekta an tamang buwis asin babayadan sa mga negosyong nag-ooperar sa ciudad.
