Napili bilang benepisyaryo an Barangay Sabang sa pinakaenot sa 27 barangay sa Ciudad nin Naga nin Rainwater Catchment Facility Project kan Waves for Water Philippines, sa pakikipagtabangan kan City Government of Naga asin kan Angat Buhay Foundation.
Sa intrevista kan Bombo Radyo Naga Ki Marian Briones Aureus, Barangay Secretary kan Barangay Sabang, piglansar an proyekto kan Hunyo 9 makalihis na magkondusir nin pagbisita asin pagidentipikar kan Waves for Water Philippines an mga lugar na haloy nang nakakamati nin kakulangan nin tubig.
Segun ki Aureus, naimplementar sa laog sana nin apat na bulan, pag-abot kan Oktubre an proyecto tanganing matabangan an mga residente na haloy nang nasasakitan na makakua nin bastanteng tubig para sa saindang pang-aro-aldaw na pangangaipo.
Kabale sa mga napiling lugar sa lindong kan proyekto iyo an Zone 5, Metroville, asin Zone 6, Villa Foljentes, kun saen an mga residentes haloy nang igwa nin iregular na problema sa suplay nin tubig.
Sa pagtarabangan kan Waves for Water Philippines asin kan lokal na gobyerno kan Naga, napili an Barangay Sabang bilang enot na benepisyaryo kan proyekto.
Dakulang tabang an Rainwater Catchment Facility, lalo na sa mga residentes kan Metroville na haloy nang nakakaeksperyensya nin dai masasarigan na supply nin tubig.
Pigkakarkulong labi sa 300 na pamilya sa Metroville an pwedeng makinabang sa tubig-uran na makokolekta sa dakulang tangke kan pasilidad.
Mientrastanto, nagpromesa an Barangay Sabang na mabugtak nin kudal sa palibot kan pasilidad tangarig na maprotehiran an istruktura asin maseguro an tamang pag-ataman asin pagmantenir kaini para sa kapakinabangan kan mga residente.
Sa paagi kan proyektong ini, piglalaoman na magiging madali an pang-aro-aldaw na buhay kan labi sa 300 na pamilya sa Metroville asin mga kaharaning lugar sa Barangay Sabang, mantang padagos na pighahanap an mas halawig na solusyon sa problema sa supply nin tubig.
