Ipinagbawal kan City Government of Makati an pagpapalupad nin drones asin iba pang klase nin unmanned aerial vehicles (UAVs) sa syudad sa bilog na bulan nin Nobyembre.
Ini may koneksyon sa nagdadangadang na 49th Association of Southeast Asian Nations (Asean) Summit na gigibuhon sa nasyon ngunyan na bulan.
Sa opisyal na pahayag na ipinaluwas sa Facebook kan Lunes, Nobyembre 2, sinabi na igwang gigibuhon na nagkapirang aktibidad asin high-level meetings na pag-ayonon kan gobyerno kan nasyon kaiba an manlaen-laen na pamayo asin representante kan mga dayuhang estado, dignitaries, asin international delegates.
Lininaw kan syudad na ini tanganing maobserbaran asin masiguro an seguridad kan mga bisitang maayon sa summit, siring man an kaligtasan kan bilog na komunidad.
Hinagad man kan gobyerno kan syudad an kooperasyon asin pagkasabot kan mga drone owners, operators, asin hobbyists, kaiba an mga residente kan syudad manungod sa temporaryong polisiya na ini.
Mantang, nakatalaan man na gibuhon an Asean Summit asin iba pang mga konektadong pagtiripon sa maabot na Nobyembre 16 sagkod Nobyembre 18 ngunyan na taon, na idineklara man na special non-working holidays sa bilog na Metro Manila sa pagboot ni Pangulong Ferdinand Marcos Jr.
