Pigtawan-duon ni Atty. Benjamin Guillermo V. Magadia, sarong Law Professor na si Senador Ronald “Bato” dela Rosa dapat na magsuko sa mga awtoridad tanganing atubangon an mga alegasyon laban saiya may koneksyon sa mandamiento de aresto na konektado sa International Criminal Court (ICC). Segun ki Magadia, mas magkakanigong atubangon kan senador an legal na proseso ngani na magkaigwa nin tsansa na magdepensa.
Sa intrevista kan Bombo Radyo Naga ki Atty. Benjamin Guillermo B. Magadia, Law Professor, pigkwestyon kaini an legal na basehan kan P50-million na reward na itinao suboot kan gobyerno para sa mga impormasyon na makakatabang sa pagdeterminar kun haen si Dela Rosa.
Pighurot man kaini na an pangangaipo na linawon an legal na basehan kan siring na lakdang, urog na may relasyon sa ICC an bagay na ini.
Tinawang-duon man kan abogado na importante na magpaluwas nin malinaw na interpretasyon an Korte Suprema dapit sa hurisdiksyon kan ICC sa Pilipinas, partikularmente sa mga krimen na soboot naginibo kan miembro pa kan Rome Statute an nasyon. Isinuherir man niya na pag-adalan an posibilidad nin pag-aresto sa harong o iba pang maninigong paagi nin pag-ataman mantang pinoprotektahan an mga deretso kan senador.
Mientrastanto, an pagpapadagos kan Impeachment Trial ni Bise Presidente Sara Duterte sa Nobyembre 9. Segun ki Magadia, importante sa depensa na magpresentar nin mga dokumento, bank records, asin iba pang evidencia na iyo an magpapaliwanag kan ginikanan asin pagtalubo kan soboot yaman kan bise presidente. Pigtawan-duon man kaini an kahalagahan kan Sub Judice Rule tanganing mamantenir an patas na pagbista asin maibitaran an impluwensya sa mga senator-judges.
Dugang pa ni Magadia an legal na paghiling kaini na dapat magsuko na si Dela Rosa sa mga otoridad tanganing atubangon an mga alegasyon sa paagi nin Due Process of law.
