Inaprubahan ng House of Representatives (HOR) ang paglilipat ng ilang pondo sa ilalim ng panukalang 2027 national budget bunsod ng mabagal na paggastos ng ilang ahensiya ng pamahalaan.
Batay sa mga ulat, umaabot sa P15.33 bilyon ang pondong nakalaan para sa disaster rehabilitation and reconstruction na hindi nagamit at maaari umanong ilipat sa mga programang mas mabilis na naipatutupad.
Ayon kay Bataan 2nd District Rep. Albert Garcia, senior vice chair ng House Committee on Appropriations, natukoy sa mga pagdinig ang ilang programang mabagal ang implementasyon at may natitira pang pondo.
Ipinaliwanag ni Garcia na inililipat ang ilang alokasyon sa mga prayoridad na programa upang hindi manatiling nakatengga ang pondo ng bayan habang inaayos ng mga kinauukulang ahensiya ang kanilang sistema sa pagpapatupad ng mga proyekto.
Nilinaw din niya na piling programa lamang ang naapektuhan ng mga pagbabago at hindi ang kabuuang budget ng mga ahensiya.
Samantala, sinabi ni FPJ Panday Bayanihan Party-list Rep. Brian Poe na batay sa tala noong Hunyo 30, 2026, nasa P15.33 bilyon ang hindi nagamit mula sa Disaster Rehabilitation and Reconstruction Assistance Program sa ilalim ng National Disaster Risk Reduction and Management Fund.
Dahil dito, iminungkahi ang pag-amyenda sa panukalang budget upang madagdagan ang quick response funds ng Department of Social Welfare and Development (DSWD) at Department of Agriculture (DA).
Binigyang-diin ni Poe na mananatiling nakatuon sa pagtugon sa mga kalamidad ang naturang pondo, ngunit ilalaan ito sa mga ahensiyang may kakayahang mas mabilis na makapaghatid ng tulong sa mga apektadong mamamayan.
Hinimok din niya ang Senado at mga civil society organization na makiisa sa pagsusuri kung aling mga programang may mababang antas ng paggastos ang maaaring pagkunan ng pondo para sa mas agarang pangangailangan.
Ang paglilinaw ay ginawa kasunod ng mga katanungan tungkol sa P190 bilyong halaga ng mga amyenda ng Kamara sa panukalang pambansang badyet.
