Inamin ni Atty. Anel Martin Antero na naging bahagi siya ng legal team ni Vice President Sara Duterte kaugnay ng mga kasong kinaharap ng Bise Presidente.
Nabunyag ito sa isinagawang cross-examination ni prosecution counsel Atty. Amando Virgil Ligutan sa impeachment trial nitong Huwebes, Nobyembre 12. Tinanong ni Ligutan si Antero kung maituturing siyang masugid na tagasuporta at tagapagtanggol ni Duterte.
Bilang tugon, kinumpirma ni Antero na tumulong siya sa legal team ng Bise Presidente sa pagharap sa mga kasong isinampa laban dito. Inamin din niyang matagal na niyang kaibigan sina Duterte at ang asawa nitong si Atty. Manases Carpio.
Sa pagpapatuloy ng pagtatanong, ipinakita ni Ligutan ang ilang social media post ni Antero na nagpapahayag ng suporta kay Duterte sa iba’t ibang pagkakataon. Layunin ng prosekusyon na suriin ang personal na ugnayan ng testigo sa Bise Presidente at ang posibleng epekto nito sa kaniyang testimonya bilang saksi ng depensa.
Si Antero ang ikalimang testigong iniharap ng depensa sa impeachment court. Kabilang sa kaniyang layunin ang pagbibigay-linaw sa ilang transaksiyong may kaugnayan kay Carpio, partikular ang mahigit ₱205,000 na bayarin sa isang restaurant sa Tokyo, Japan noong Mayo 19, 2023.
Ayon sa depensa, kasama ni Antero si Carpio sa naturang biyahe at ginamit ang credit card ng huli upang bayaran ang restaurant bill. Ipinaliwanag ng testigo na pinagsaluhan ng mga kasama sa grupo ang gastusin at kalaunan ay binayaran ng bawat isa ang kani-kanilang bahagi.
Matatandaang nakasentro ang kasalukuyang paglilitis sa Article II ng impeachment complaint laban kay Duterte, na tumatalakay sa mga alegasyon ng unexplained wealth at hindi wastong deklarasyon ng kaniyang mga ari-arian sa Statement of Assets, Liabilities and Net Worth (SALN).
