NAGA CITY – Pigsayumahan kan Pilipinas an akusasyon kan China na pigraot kan pigsadsad na BRP Sierra Madre sa Ayungin Shoal an coral reef ecosystem sa lugar.
Pigtukdo ni National Task Force-West Philippine Sea spokesperson Jonathan Malaya na an China an totoong nagkawsa nin danyos sa mga coral asin nagraot sa natural habitat asin kabuhayan kan ribu-ribong parasisirang Pilipino.
Pigsambit kan opisyal na an mga akusasyon kan mga inaapod na Chinese experts laban sa Pilipinas mayong katotoohan asin saro sanang paglilihis sa isyu.
Ginibo kan opisyal an patara-tara makalihis ibareta kan Chinese state-owned media na Global Times na nadiskubre soboot kan Chinese experts na nagkawsa nin danyos sa coral reefs sa Ayungin an kinakalawang na BRP Sierra Madre asin polusyon gikan sa mga basura asin ati kan mga personnel na nakaistasyon sa barko.
Sa lado kan Pilipinas, pigsambit ni Malaya na may ebidensya sinda na nagpapahiling na responsable an China sa labing danyos sa corals sa Bajo de Masinloc, Rozul Reef, Escoda Shoal, Sabina Shoal, magin sa Pag-asa Cays 1, 2, asin 3.
An mga kumpulan asin illegal fishing activities man soboot kan Chinese maritime militia an nagraot sa marine environment sa West Philippine Sea.
Sa huri, nagpatanid an tagapagtaram kan NTF-WPS sa publiko asin sa international community laban sa paghihigos kan China na magpakalat nin fake news asin salang impormasyon laban sa Pilipinas, kasabay kan pangapudan para sa sarong independent marine scientific assessment sa West Philippine Sea.
