NAGA CITY – Nagpaabot nin pagkadismaya an alkalde kan syudad nin Naga huli sa mabagal na paghiro para sa development kan Naga Airport sa Pili, Camarines Sur.
Sa nagin paghampang sa mga kagawad kan media ni Naga City Mayor Nelson Legacion, sinasyay kaini na saro sa mga pighihiling kaining rason an huli sa problema sa acquisition kan properties.
Dugang pa kan opisyal, na basado sa impormasyon na nakaabot saiya kadakol na mga may sadiri nin daga asin nakaistar sa lugar an maapektaran orog na ta pigkakarkulong mapakol sa 134 hectares an gagamiton para digdi.
Nadismaya an alkalde huli ta inabot na nin sampulong taon alagad hasta ngunyan an mayo pa nin nagigin pag-usap kan nasambitan ng isyu.
Tinawan duon man kan opisyal na an mga pamilya orog na an mga igwa nin pigpapaklase an dapat na igwa nin contingency plan para sainda, alagad hasta ngunyan an dae pa ini nahihiling sa lado man kan Department of Transportation asin iba pang ahensya. Pigkakarkulo naman na mapakol sa P402-M an pigtagamang pondo para digdi alagad an makakapagpadakula sana talaga an gagastoson para sa acquisition kan properties o kan daga.
Sa ngunyan, pinaglalaoman na sana kan opisyal na mapupuonan na an paggulong kan development na ini asin dagusan na ining maiisagibo para sa mas orog na pag boost sa ekonomiya asin turismo kan Camarines Sur asin Naga.
