Nagsunad nin subpoena para sa apat na lideres gikan sa dae tinukoy na mga progresibong grupo an Philippine National Police (PNP) Criminal Investigation and Detection Group (CIDG) tangani puonan an imbestigasyon manungod sa mga kaganapan kan nakalihis na Trillion Peso March Rally sa Maynila kan nakalihis na Setyembre 21.
Sigun ki CIDG Public Information Office Officer-in-Charge PMaj. Helen Dela Cruz, obheto kaini na tawang linaw an mga nangyaring kariribokan sa Maynila na iyong nagresulta kan pagkakaigwa nin mga iridong pulis asin pagkakaarestar kan pirang indibidwal na parte kan nasambitan ng kilusan.
Ini an tangani maaraman kun igwa nin kinaraman an saindang mga grupo sa nangyaring ribok asin kun sinda talaga an may ipinadarang tao tangani magsagibo nin kariribokan sa dapat kuta na matuninong na protesta sana.
Masunod na lakdang man kan CIDG dapit sa mga personalidad na saindang ipinaapod, iyo an pagsusumiter nin petisyon para sa indirect contempt of court para sa mga inimbitarang indibidwal na dae agsimbag sa saindang imbitasyon.
Ini an komo penalidad sa saindang noncompliance na iyong alinsunod man sa ipinapautob na ley manungod sa pagsusunad nin subpoena.
Mientrastanto, sa apat na ipinaapod, sulamenteng sarong lider sana an nag sipot asin nagsimbag sa subpoena kan CIDG mantang an tulo an padagos na hinahalat pa sa ngunyan kan yunit.
Sigun man ki PNP Spokesperson asin Public Information Office Chief PBGen. Randulf Tuano, dae digde natatapos an saindang mga ipapaapod na indibwal huli ta posible pa nindang imbitaran an dae mababa sa 20 mga personalidad tangani magpaliwanag sa saindang himpilan katakod sa nasambitan ng riot.
