Aram baya nindo mga ka-bombo, sarong babae na gikan sa Spanya an nagkolektar kan saiyang disability pension huli sa kakundian sa pagtaram alagad ini an napag-araman na peke palan.
Susog sa report, an babae nagdeklarar na mayo nin kakayanan na makapagtaram makalihis an work-related incident 16 taon na an nakakalihis. Alagad nadiskubrer kan sarong private detective na peke palan an helang na ini kan babae.
Kan taong 2003, sarong babae an nagtatrabaho sa supermarket sa Andalucia, Spain, an pig-atake kan customer, makalihis an nasambitan ng traumatic incident, ini an diagnosed na igwa kan pig-aapod na post-traumatic stress disorder asin nawaran nin abilidad na magtaram.
Katakod digde, makalihis man na i-review an kaso kan babae, an Social Security pigtawan an babae nin permanent disability pension, alagad huli ta ini an work-related incident, an insurance company an iyong nasugo na magin responsable sa pagbayad.
Sarong taon an naglihis, komo regular procedure, an insurance company pig-review an kaso ka babae asin napansin an nagkapirang iregularidad na nagresulta sa pagkundusir nin imbestigasyon.
Sarong private detective an pig-upahan na aramon an dapit sa kakundian kan babae kun saen digde na nadiskubre na igwang kakayanan an babae na magtaram alagad padagos na nagkokolektar kan disability payments.
Tanganing patotoohan na kayang magtaram kan babae, pigranihan kan private detective an babae sa tinampo asin naghapot kan direksyon.
Mantang nagtataram an babae ini an pigrerecord kan nasambitan ng private detective. Kan nakalihis na January, an High Court of Justice of Andalusia pigpaburan an insurance company, na an ebidensiya na pigpresentar ninda, an audio recordings kan babae an valid asin pigsugo na dae na kaipuhan pang bayadan an babae kan disability benefits.
Pigbasura man kaini an apelar kan babae na dae akuon an audio recording na pigpresentar sa korte nin huli ta pagbayolar soboot ini sa saiyang constitutional rights.
