NAGA CITY – Magtatao nin asistensya sa maabot nin Brigada Eskwela an Barangay Council kan Concepcion Grande mantang sainda man na pig-eenkaminar an mga out-of-school youth na mag-enroll sa Alternative Learning System(ALS).
Sa entrevista kan Bombo Radyo Naga ki Jerrold Rito, Barangay Kapitan kan Barangay Concepcion Grande, Naga City, nag-atendir soboot ini sa paglunsar kan encampment program kan Department of Education kun saen nagheras soboot an nasambitan na mapuon na sinda kan Brigada Eskwela asin nagpromesa soboot ini sa DepEd na gabos nin personahes kan saindang barangay, kun ano an saindang maitatabang, saindang itatao.
Sa ngunyan mayo pa man soboot nin koordinasyon kun nuarin an kickoff kan Brigada sa Concepcion Grande Elementary School asin Villa Grande Elementary School, na mga eskwelahan na sakop kan saindang barangay.
Sainda man soboot na pigsusuportaran an mga eskwelahan na ini sa kun ano an saindang kayang itao. Sigun ki Rito padagos sana an saindang mga barangay literacy worker asin ALS Coordinator sa pagsasagibo nin field work kun saen nagsisiring soboot an mga ini sa kada Zona tanganing i-enkaminar an mga joven na mawot nin magtapos nin pagklase sa paagi kan ALS.
Pig-aasisteran man soboot kan mga nasambitan an mga presenteng nagkaklase asin dai pa nakakapasar sa programa. Maswerte man soboot sinda na mahihigos an saindang barangay literacy worker asin ALS Coordinator nin huli ta kadakul nin nakatapos sa nakaaging ALS Graduation sa saindang barangay.
May nagkakapira man soboot na estudyanteng pigtututukan tanganing makapasar sa assessment asin magin competitive pag-abot sa pagklase ninda sa senior high school o kaya sa kolehiyo.
Mensahe man kaini sa saiyang mga ka-barangay saiyang pig-eenkaminar an mga ini na mag-enroll sa Alternative Learning System kan DepEd nin huli ta ini soboot dakulang tabang tanganing ma-boost an kumpiyansa sa sadiri kan sarong tawo, tanganing makatapos nin pagklase, asin tanganing makakua nin mas maray na trabaho. Pigmamalaki man kaini an higos kan saindang mga literacy worker asin ALS Coordinator.
