NAGA CITY- Nagkundusir nin blood letting activity an pamayuhan kan Mabolo, Naga City ngunyan na aldaw.
Sa entrevista kan Bombo Radyo Naga ki Arthur Matos, Punong Barangay kan Mabolo, Naga City, sinaysay kaini na igwa soboot sindang pigtangro na token sa mga madonar siring kan bagas, sugok, pansit asin igwa pang pang snack.
Sigun sa opisyal, obheto kan saindang aktibidad na padagos na magkaigwa nin suplay kan dugo sa blood bank na makakatabang sa pagsumpay nin buhay.
Katakod digde, nag-assist man an BHW kan saindang barangay sa mga personahe kan Bicol Medical Center para sa mga nagpalistang ma-donate nin dugo.
Kasabay kan nasambitan ng aktibidad, liwat man na pig-enkaminar ni Matos an mga nakapagkua na nin dugo sa saindang barangay na ibalik man ini sa paagi kan pagdo-donate.
Pigtawan duon kan opisyal na dakulaon katabangan an pagdodonar nin dugo tanganing igwang makua an mga tawo na mangangaipuhan kaini.
Responsabilidad kan mga nakakua na nin dugo na ibalik man ini tanganing dae magkaigwa nin kakulangan.
Sa ngunyan, nagpasalamat na sana ini sa mga nagtarabang tanganing magin posible an nasambitan ng aktibidad.
