NAGA CITY- Pigtawan duon kan opisyales kan DSWD-Bicol na saro an Bicol Region sa igwang pinakadakol na benepisyaryo kan Pantawid Pamilyang Pilipino Program o 4ps.
Sa nagin paatara-tara ni Norman S. Laurio, Regional Director kan DSWD Field Office V, sinaysay kaini na kan nakalihis na taong 2023 an allocated fund para sa 4PS an nagpakol sa P8.26-B kun saen nasa 409,909 man an funded household beneficiary na nagpapahiling na an Bicol Region an classified komo igwang pinakadakol na household beneficiary.
Para man sa presenteng taon, an allocated fund an nagpakol sa P9.19-B para sa cash grant kan 4PS mantang an na-disburse an nag-abot na sa P4.41-B.
Sigun pa sa opisyal dagos an saindang re-assessment sa mga miyembro kan programa tanganing matutukan kun siisay talaga an mas nangangaipuhan nin tabang.
Pigsierto pa ni Laurio na yaon an saindang ahensiya tanganing magtao nin suporta sa mga pamilya, jovenes asin iba pa tanganing mapauswag an saindang mga buhay asin makahawas sa kapagteosan.
Sa ngunyan, nakasentro an DSWD sa pag-utob sa mga kasuguan kan gobierno para sa ikakamarhay kan mga namamanwaang Pilipino.
