Pigkumpirmar kan Department of Agriculture (DA) na igwa talagang naipapabakal na mga bagas na igwa nin bukbok sa sarong stall kan saindang ‘Rice-for-All’ program sa Quezon City.
Duon ni Agriculture Secretary Francsico Tiu Laurel Jr., bako ining bagas na naggikan sa National Food Authority (NFA). Apwera sa kumpirmadong igwa nin pigpapabakal na siring na klase sa Kadiwa stall sa nasambitan ng lugar, pinapaimbestigaran na man kan sekretaryo an insidente.
Pig-apod man ni Laurel na saro sanang ‘isolated case’ an insidenteng ini asin sigun soboot sa naguno kaining impormasyon, sa katunayan an igwa nin nanutaran na diit na bukbok sa mga biagas pagbukas kan sako kaini.
An dae sana soboot maintindihan kan sekretaryo an tano pigpadagos pa an pagpapabakal kaini kun sa katunayan an pinapundo na an bentahan kan mga siring na klase kan bagas sa merkado.
An isolated incident man soboot na ini maikokonsiderar na lesson para sa Food Terminal Incorporated (FTI) asin sa mismong ahensya na magkaigwa nin marhay na pagsususri sa quality control kan mga bagas antes ini irelease asin ipabakal sa publiko.
Pagsisierto ni Laurel, kakaulayon asin personal kaining pangengenotan an imbestigasyon tanganing masierto kun saen an pinaggikanan kan bagas asin mapauntok na an nagigin bentahan kaini sa publiko.
Sa ngunyan, piglaoman na sa masunod na semana, posible nang mabakal an mga NFA rice sa publiko partikulamente na sa mga Kadiwa stalls para sa nagpapadagos na ‘Rice-for-all’ program kan ahensya.
