Masabak giraray para sa bagong titulo sa kinaban an duwang beses nang Olympic gold medalist na si Carlos Yulo.
Ini matapos siyang makalaog sa apparatus finals kan floor exercise asin vault events sa 54th Artistic Gymnastics World Championships sa Rotterdam, Netherlands.
Dawa ngani dai nakakua an “Golden Boy” para mag-qualify sa all-arounds matapos mauli sa ika-34 na pwesto, buhay pa man giraray an saiyang determinasyon para sa bagong titulo sa kinaban.
Nagtapos si Yulo sa ikaduwang pwesto para sa floor exercise sa score na 14.500, mantang nagtapos man siya sa ika-anom na pwesto para sa vault hale sa saiyang score na 14.266, kun sain pareho siyang nakalaog sa finals kan nasabing apparatuses.
Kaiba man ni Carlos an saiyang nguhod na tugang na si Karl Eldrew Yulo na nakakua man kan ika-84 na pwesto sa kabilugan.
Nakatakdang makipaglaban para sa floor exercise an matuang Yulo sa masunod na Sabado, sunod an patiribayan sa vault na mangyayari sa Domingo.
Tolo nang titulo sa kinaban an nakaptan kan gymnast star, kun sain nakua niya an enot na titulo kan 2019 sa Germany, an ikaduwa kan 2021 sa Japan, asin kaini sanang 2025 sa Indonesia.
Kan nakaagi lang, duwang bulawan giraray an saiyang dara matapos niyang makua an mga bulawan na medalya hale sa Asian Games na ginibo sa Japan kaini sanang Setyembre kan taon.
