NAGA CITY- Piglalaoman na magigin operational na ngunyan na taon o sa primerong mga bulan kan masunod na taon an Center for Safety and Resillience (CESAR) building na pigpapatugdok kan LGU-Naga sa barangay Balatas sa nasambitan ng syudad.
Sa nagin paghampang sa mga kagawad kan media ni Renne Gumba, pamayo kan Public Safety Office-Naga, sinaysay kaini na sa presente nasa 50% naman na tapos an phase 2 kan edificio mantang nasa 16.5% naman na tapos an phase 1.
Piglalaoman man na matatapos an phase 2 sa bulan kan Setyembre mantang paglalapigotan man na matapos an phase 1 ngunyan na taon.
An enterong building man an nakatalaang matapos pag-abot kan Nobyembre 2025. Pinag-aadalan naman soboot kan saindang lado kun posible bang magin operational na ini enkaso makumpleto o matapos na an phase 1 kan building.
Pigbubusol man kan ahensya na magkaigwa nin national regulatory mechanism an mga Public Safety Offices sa enterong nasyon tanganing matawan man nin proteksyon an saindang mga personahes.
Sa siring na paagi igwa man nin makukuang benipisyo an mga nagtatrabaho sa nasambitan ng opisina.
