Nagtao an China nin mga donasyong relief goods para sa mga biktima kan makukusog na linog na tumama sa Davao Oriental.
Itinurn-over kan Chinese Consulate General sa Davao an P4 milyong kantidad nin relief goods na inako man ni Governor Nelson Dayanghirang gikan ki Chinese Deputy Consul General Wang Mingqing sa Provincial Capitol Gym sa siyudad kan Mati.
Sigun sa Chinese official, naglalaom sindang matarabangan kaini an mga residentes kan Davao Oriental na makabangon gikan sa sakuna asin nagpahayag nin pakikisumaro sa mga naapektaran kan linog.
Apat na trucks kan relief aid an ipinadara sa Incident Command Post na igwa nin emergency food supplies, kabali an bagas asin canned beef.
Ipinasakamot man kan mga representantes kan Association of Davao Fil-Chinese Communities an dugang na P700,000 kantidad kan relief assistance. Sigun sa gobyernong pangprobinsya, labi sa 170,000 pamilya na sa probinsiya an naapektaran kan doublet earthquake.
