Padagos an Commission on Elections (COMELEC) sa Caramoan na nagkokondusir nin massive satellite registration kan mga botante sa manlaen-laen na barangay, kabale na an mga coastal asin island communities.
Sa intrevista kan Bombo Radyo Naga ki Dennis Gomez Election Officer, COMELEC Caramoan, dakulang tabang an magayon na panahon kan mga nakalihis na semana mantang nagrahay an turnout kan mga aplikante.
Kan nacaaguing Viernes, nakapag-record an COMELEC nin 139 bagong rehistradong votantes sa Barangay Kabangkongan, mas halangkaw pa sa naandan na 15–20 aplicantes sana sa oficina kan PCC. Target kan COMELEC na makarecruit nin dagdag na 10% hale sa total na 36,000 na rehistradong botante sa Caramoan. Apwera sa mga jovenes na nag-15 anyos, kadakol man an mga first-time registrant na nasa edad 25 sagkod 30 na dai pa nakapagrehistro kaidto.
Saro sa pinakadakulang agyat iyo an transportasyon, lalo na sa mga isla asin hararayong barangay. Halangkaw an presyo kan gasolina sa Karamuan, minaabot sa ₱100 kada litro, asin an arkila nin baroto nasa pag-ultanan kan ₱2,500 sagkod ₱3,500 depende sa distansya. Sa ibong kaini, padagos an pagsuporta kan mga opisyales kan barangay asin lokal na gobyerno sa paagi kan pagtao nin mga behikulo asin tabang logistical.
Sa proseso kan pagparehistro, an mga aplikante mahigot na pig-i-screen tanganing maibitaran an pagdoble o salang impormasyon. An mga sertipiko nin pagkamundag asin balidong mga ID parateng hinahagad, asin kun may pagduda, an mga opisyales kan barangay an kinokontak para sa pag-verify. May mga pagkakataon na dai inaako an mga aplikasyon kun napatunayan na bako sindang residente kan barangay na iyan.
Sa mga masunod na semana, an COMELEC mabisita sa pigkakarkulong 18 sagkod 20 pang mga barangay para sa satellite registration antes an deadline sa Mayo. Piglalaoman na labi sa 1,000 pang mga aplikante an madagdag sa voter rolls.
Nagpagirumdom man an COMELEC sa publiko na dae na maghalat sagkod sa huring aldaw kan rehistrasyon. Bukas an mga opisina dawa Sabado asin holiday para mapadali an proseso. Idinagdag ni Officer Dennis na bakong igo an pagigin rehistradong botante sana; importante man na magin responsable sa pagpili nin mga kandidato.
Apwera sa pirilian sa barangay, pinapagiromdom man an mga namamanwaan na magpraktis nin tama sa pagpili nin mga opisyal huli ta sa taon 2028 magkakaigwa nin pirilian nasyonal asin lokal.
