NAGA CITY- Makundusir nin Oplan Baklas an Comelec-Naga kasabay sa pagpuon kan campaign period para sa mga National Candidates sa maabot na Pebrero 11, 2025.
Sa entrevista kan Bombo Radyo Naga ki Atty. Maico Julia Jr, Election Officer kan Comelec-Naga, sinaysay kaini na kaibahan soboot ninda sa nasambitan ng operasyon an mga personahe kan PNP, DENR asin DPWH.
Sigun ki Julia, kabali sa saindang babaklason an mga oversized na campaign posters/materials asin mga election paraphernalia na nakakabit sa salang area o lugar.
Dugang pa kan opisyal, pwede man na an mga kandidato mismo an maghali kan saindang mga campaign materials orog na kun aram kan mga ini na dae nagsusunod sa panundon kan Commission on Elections an saindang mga ikinabit.
Pigtawan duon pa kan opisyal na an mga campaign posters na yaon sa laog kan sarong residensiya an dapat na igwang pagtugot gikan sa may-sadiri kan harong.
Mientrastanto, mapuon man sa bulan kan Marso an campaign period para sa mga local candidates kun saen makundusir giraray nin Oplan Baklas an Commission on Elections.
Sa ngunyan, hagad na sana ni Julia an tabang kan publiko tanganing maikundusir nin marhay asin matuninong an mga programa kan Comelec-Naga kasabay kan nararaning 2025 Midterm Elections.
