NAGA CITY- Liwat na nangapudan an Comelec Naga sa mga pulitiko na magsunod sa istriktong pagpapautob kan “Anti-Epal” policy.
Sa entrevista kan Bombo Radyo Naga ki Atty. Maico Julia Jr, Election Officer kan Comelec-Naga, sinaysay kaini na importante an pagsunod sa nasambitan ng panundunan orog na ngunyan na nararani an Barangay asin SK Election.
Marurumduman, ipinagsugo kan Department of the Interior and Local Government (DILG) an istriktong pagpapautob kan “Anti-Epal” policy sa bilog na nasyon kun saen ipinagbabawal na ibali an pangaran asin lalawgon kan mga opisyal o pulitiko sa mga proyekto kan gobierno.
Ini an nakapalaog sa Memorandum Circular No. 2026-006, na kun saen pigsusugo an gabos kan mga opisyal sa probinsiya, siyudad, munisipalidad asin barangay pati naman an mga ahensiya sa sentral, rehiyonal, field offices asin iba pang katakod na ahensiya na siertuhon na no public official’s name, photo, logo, initials, color motif, slogan, or any identifying symbol appears on project signages, markers, tarpaulins, and similar materials funded by public money.”
Dugang pa ni Julia, an nasambitan ng kasuguan an haloy naman nakabugtak sa konstitusyon alagad orog na pinahigot sana ngunyan tanganing magsunod an gabos.
Pigtawan duon pa kan opisyal na dae pwedeng makisawsaw an mga pulitiko sa mga pigpapanaong tabang kan gobierno orog na an pagbugtak nin mga pangaran sa proyekto huli ta an governent funds asin facilities an para sana sa government used.
Mientrastanto, piglinaw man ni Julia na pagnagpuon an campaign period sa eleksyon pwede pa man giraray an pagbubugtak kan saindang pangaran asin lalawgon sa mga campaign materials susog sa sukol na pigluwas kan Comelec.
Alagad bawal gamiton an government facilities, vehicle sa pangangampanya.
Sa ngunyan, hagad na sana kaini na magsunod an gabos sa nasambitan ng kasuguan.
