NAGA CITY- Nairido an sarong persona makalihis an nangyaring karambola kan tolong behikulo na imbwelto an convoy kan Department of Justice (DOJ) asin behikulo na pigmamaneho kan sarong pulis sa banwaan nin Libmanan, Camarines Sur.
Sa entrevista kan Bombo Radyo Naga ki P/Supt. Errol Garchitorena, hepe kan PNP Libmanan, sinaysay kaini na binabagtas kan DOJ van na pigmamaneho ni Mahmoud Najilun, 40-anyos an kalabaan kan tinampo sa barangay Sibujo kan maksidente ining makabangga sa hurihang parte kan SUV na pigmamaneho kan pulis na si SPO1 Ronald Malaluan, 38-anyos na presenteng naka-assign sa PNP Capalonga sa probinsya nin Camarines Norte.
Huli digdi, nakabangga pa suboot an SUV sa saro pang van kan DOJ na pigmamaneho man ni Joselito Fidel na miyembro kan Intelligence Security Officer kan Witness Protection Security and Benefit Program arog man ni Najilun.
Nagsapo nin lugad sa lawas si Najilun na tulos man na idinalagan sa ospital para maipabulong.
Napag-araman na pasiring kuta na sa Metro Manila an nasambitang mga lunadan kan mangyari an aksidente.
