NAGA CITY – Full-force sa pagtabang sa Naga City an Camarines Sur Police Provincial Office katakod sa papaabuton na fluvial procession.
Sa entrevista kan Bombo Radyo Naga ki PCPT. Liza Jane Alteza, Spokesperson – CSPPO, sinaysay kaini na padagos man an saindang pagsuporta orog na sa Naga City Police Office tanganing mas magin matoninong an saro sa pinaka-highlight asin dakulang event sa kafiestahan kan siyudad.
Dugang pa kaini, piglalaoman man kan mga otoridad na maabot sa haros sarong milyon na mga deboto an mapasiring sa lugar tanganing mag-atendir kan nasambitan ng aktibidad. Sigun pa ki Alteza, igwa man soboot sindang ipinadarang reactionary force, SWAT team, magin mga VIP security asin iba pang grupo na matabang tanganing mas salbado an fluvial procession.
Siring man, igwa na man na-establisar na border control point na mga kapulisan an CSPPO asin preparado na man soboot an saindang emergency response team tanganing magtao nin asistensiya sa mga nangangaipuhan.
Pigtawan-duon pa kan opisyal na dae pa nagpupuon an mga kaganapan sa siyudad an sainda man na intel operatives an nagtatrabaho na tanganing mahiling kun igwang mga threat sa seguridad orog na sa mga piggigibo asin gigubuhon pa sanang aktibidad.
Mientrastanto, nag-abot man sa 300 na mga kapulisan gikan sa CSPPO an nakadeploy na sa siyudad magpuon pa kan pagpuon kan aktibidad sa Peñafrancia asin matinir an mga ini hasta sa matapos.
Sa ngunyan pakiulay na sana ni Alteza sa publiko bako sana ngunyan na kafiestahan sa Naga City magin sa papaabuton man na selebrasyon kan Martial Law sa Setyembre 21, na sana an duwang aktibidad na ini an magin matoninong asin mayong mairehistrong anuman na kariribokan.
