Nakapagrehistro an Philippine National Police Anti-Cybercrime Group (PNP-ACG) nin 21.84% na paglangkaw kan cybercrime cases sa nasyon sa premirong quarter kan taon kumparar sa kaparehong panahon kan nakalihis na taon.
Sa datos kan Philippine National Police Anti-Cybercrime Group, an online selling scams, credit card fraud asin investment scams an nangengenot sa saindang talaan.
Kasunod kaini, sinaysay ni PNP Chief Gen. Rommel Francisco Marbil na pinaigting na kan Pambansang Pulisya an kampanya kontra sa cybercrimes asin matagama nin mas kadakol na resources tanganing mas mapakusog an saindang kakayahan sa paglaban sa nagdadakulang huma kan mga cyber-related offenses.
Sigun ki Marbil, saiyang pinatututukan sa mga cyber cops an mga kaso kan internet crimes.
Pig-eenkaminar man kaini an publiko na tulos mag-apod sa PNP enkaso nabiktima kan mga kawatan o igwa nin concerns sa PNP Hotline: 117 or 911, Anti-Cybercrime Group: (02) 414-1560 asin PNP Internal Affairs Service: (02) 723-0401 to 20.
Mientrastanto, magpapadagos-dagos man soboot an awareness campaign kan pulisya tanganing maipaaram sa publiko an mga modus kan sindikato tanganing dae na sinda mabiktima kan mga ini.
