Padagos an masigasig na paglilibot kan Department of Agriculture (DA) sa manlaen-laen na merkado sa Metro Manila.
An obheto kan mga pag-iikot na ini an tanganing mahigot na bantayan asin masubaybayan an presyo kan mga primerong barakalon na kinakaipuhan kan mga mamamayan.
Pigsisierto kan DA na mayong labi na paglangkaw sa presyo kan mga produkto asin na bastanteng suplay sa mga merkado.
An nasambitan ng paglilibot an pinangenotan ni DA Assistant Secretary for Agribusiness, Marketing, and Consumer Affairs Atty. Genevieve Velicaria-Guevarra, kaibahan an Food Terminal Inc.Sinda mismo an nagsagibo kan market visit sa duwang primerong merkado, an Bicutan Market asin an Taguig People’s Market.
Personal nindang kinaulay an mga nagtitinda asin nagbabakal tanganing maaraman an kamugtakan kan presyo asin suplay kan mga produkto.
Sa isinagibong masusing inspeksiyon asin pagmanman, nahiling asin napansin na bahagyang naglangkaw an presyp kan nagkapirang imported na produkto siring kan imported rice, kamatis, sili, asin nagkapirang klase kan sira.
An paglangkaw na ini pwedeng huli sa manlaen-laen na mga rason, kaibahan na an pagbabago sa kantidad asin an gastos sa pag-angkat.
Siring man, igwa man magayon na bareta huli ta nagbaba man an presyo kan manok asin orig, na nakatabang tanganing mapagian an gastuson kan mga parabakal.
Sa ibong kan paglangkaw kan nagkapirang imported na produkto, natukoy man sa inspeksiyon na makusog asin padagos an bentahan kan mga lokal na produkto, partikularmente na an lokal na bagas asin karne.
Ini an nagpapahiling na mas pinili kan mga parabakal an mga produktong gibo sa Pilipinas. Ini man an nagpapatotoo na igwang bastante na suplay kan mga lokal na produkto sa mga merkado.
Sigun ki Asec. Guevarra, bako sanang abot-kaya an presyo kan lokal na bagas, kundi magayon man an kalidad kaini na mababakal ngunyan sa manlaen-laen na merkado sa Metro Manila.
Pig-enkaminar kaini an mga parabakal na tangkilikon an lokal na bagas tanganing suportaran an mga paraoma asin masierto an food security sa nasyon.
