DA, pigsierto na igwang bastanteng suplay kan bagas sa tahaw kan pagpuon kan panahon nin tag-uran

Pigsierto kan Department of Agriculture (DA) na igwang bastanteng suplay kan bagas sa nasyon sa tahaw kan pagpupuon na kan panahon nin tag-uran sa mga masunod na bulan.

Sigun ki DA spokesperson ASec. Arnel de Mesa, basado sa huring imbentaryo kan bulan nin Disyembre kan nakalihis na taon, nagluwas na igwang bastanteng suplay hasta sa mag-anihan sa panahon kan lean months na karaniwang an nasa katahawan kan bulan nin Hulyo o katahawan kan bulan nin Agosto.

Sa presente, an import level kan bagas para sa bulan nin Mayo 2025 an nasa 1.7 million hasta 1.9 million metrikong tonelada.

Ginibo kan DA official an pagsisierto makalihis opisyal na ideklarar kan state weather bureau an pagpupuon kan Habagat sa nasyon kan nakalihis na aldaw, Mayo 30, 2025.