Padagos pa man na pinag-aadalan kan Department of Agriculture (DA) an posibilidad nin pag-angkat nin mga puting sibulyas asin iba pang mga gulay, kasunod kan nagin epekto kan sunod-sunod na bagyo sa sektor kan pag ooma.
Sa sarong pahayag, pigsaysay ni DA Secretary Francisco Tiu-Laurel Jr. na mayo pa soboot nin pinal na desisyon manungod digde, alagad pig aadalan pa an presenteng sitwasyon sa mga omahan na pangenot nagsu-suply nin mga agricultural commodities.
Pigsaysay man kan kalihim na ini an pangenot man na pokus ngunyan kan Bureau of Plant Industry – an pagpasiring sa mga banwaan na labi na napuruhan sa panlalamasa kan mga bagyo.
Basado sa inisyal na report soboot,kadakol na mga probinsya na nagsusuply nin lowland asin highland vegetables an piglalaoman na magkakaigwa nin ng hababang production, orog na an mga probsinya sa Cordillera, Cagayan Valley, asin Ilocos Region.
Nagkapira sa mga agri commodities na nahihilingan nin pagbaba sa supply iyo man an puting sibulyas, na ngunyan an nagpuon nang magtaas an presyo gikan sa dating P80 kada kilo hasta sa P120 kada kilo.
Apwera sa puting sibulyas, nahihilingan na man nin pagbaba sa supply kan carrots, kamatis, brocoli, asin iba pa.
Enot nang pigsaysay kan DA na pig aadalan na an posibilidad nin pagkua nin dugang na supply nin mga gulay gikan sa Mindanao asin Visayas huli sa epekto kan mga bagyo sa mga omahan sa Luzon.
Ini an saro sa mga pangenot na plano kan ahensiya, apwera sa importasyon.
