Pigkumpirmar kan Department of Health (DOH) na nakakapagrehistro sinda nin paglangkaw kan numero kan mga kaso nin dengue sa nasyon.
Sigun ki Health Secretary Teodoro Herbosa, base sa monitoring kan Epidemiology Bureau kan DOH, mas halangkaw an dengue infections na naikurit ninda sa mga bulan kan Setyembre, Oktubre asin Nobyembre ngunyan na taon kumparar kan 2023.
Katakod kaini, mahigot an pagirumdom kan health chief sa mga lokal na punong ehekutibo na magsagibo nin mga paagi tanganing malikayan an labi pang pagkuriyat kan nasambitan ng helang, na nakukua sa namok. Kabali na soboot digdi an paglilinig kan kapalibutan tanganing mayong harongan an mga dengue-carrying mosquitoes.
Pig-abisohan man kaini an publiko na magin maingat tanganing dae makagat kan namok.
Enot na man nagpatanid an sekretaryo sa publiko dapit sa posibleng paglangkaw kan respiratory illnesses, siring kan abo, sipon asin magin COVID-19 huli sa paglipot kan panahon, ngunyan na nagpuppuon na an Amihan season.
