NAGA CITY- Pinara kan Department of Environment and Natural Resources (DENR) asin kan Municipal Disaster Risk Reduction and Management Office (MDRRMO) Dolores, Quezon an paghandal kan publiko manungod sa paglakop kan kalayo gikan sa grass fire sa parte kan Mt. Banahaw.
Sa ekslusibong entrevista kan Bombo Radyo Naga ki Randy Matibag, pamayo kan MDRRMO-Dolores, sinaysay kaini na ala 1:00 nin hapon kan magpuon an kasulo sa parte kan Mt. Masalukot sa boundary kan saindang banwaan asin Candelaria.
Kontrolado na suboot an kasulo huli sa marikas na pagresponde kan mga kabuhan kan Bureau of Fire Protection (BFP) tangani na masiertong dae na malakop pa an kalayo sa mga kataid kaining bulod asin sa mas dakulang parte kan Mt. Banahaw.
Mientrastanto, sa suway na pakikipag-olay kan Bombo Radyo Naga ki Magtanggol Barrion, park maintenance foreman kan DENR, sinaysay kaini na dae man nagdara nin pagka-alarma sa publiko an pangyayari huli ta taon-taon man na nagkaka-igwa nin grass fire sa sadit na porsyon kan Mt. Masalukot.
Sarong sadit na bulod an Mt. Masalukot sa ibaba kan Mt. Banahaw na madudukayan sa probinsya nin Quezon.
Pisierto man ni Barrion na magkakaigwa an saindang opisina nin maninigong imbestigasyon sa pangyayari.
