NAGA CITY- Padagos na pigpapagirumduman kan DICT CamSur an publiko dapit sa kun pano makakalikay sa scamming.
Sa entrevista kan Bombo Radyo Naga ki Maria Peñafrancia Nepomoceno, Provincial Officer kan DICT Region V-CamSur, sinaysay kaini na sa makabagong panahon na kun saen padagos an pagbabago sa teknolohiya kaipuhan man soboot an labing paglilikay kan publiko tanganing dae mabiktima kan mga cybercrimes.
Sigun ki Nepomoceno, saro sa mga paagi tanganing malabanan an problema iyo an pig-implementar kan E-Sim Registration kun saen sa paagi kaini nabawasan an mga narereseber na text scams.
Apwera digde, liwat man na pig-abisuhan kan opisyal an publiko na dae mag post nin mga personal na impormayon asin pirmeng enoton kun ano an importante sana.
Girumdumon asin isabuhay an pigsaysay kan mga eksperto na think before you click nin huli ta saro pa ini sa mga paagi tanganing malikayan na mabiktima kan mga scammers.
Dugang pa Nepomoceno gamiton pa man giraray an Pin sa mga cellphone huli ta saro pa ini sa mga salbadong paagi tanganing maproteheran an mga personal na impormasyon enkaso mawara an saimong mga gadgets.
Siringman, pig-abisuhan man kaini an publiko na dae tolos magtubod sa narereseber na chain mail nin huli ta kadalasan sa mga ini an dae totoo asin obheto sana na makapangbiktima sa iba.
Sa ngunyan, hagad na sana ni Nepomoceno sa gabos na magin responsableng social media users tanganing dae mabugtak sa alanganin na sitwasyon.
