NAGA CITY- Dakulang onra soboot an nareseber na award kan siyudad nin Naga na Digital Democracy Champion sa first-ever Digital Democracy Awards kan Makati Business Club, Inc.
Sa nagin patara-tara ni Naga City Councilor Joe Perez, sinaysay kaini na an nasambitan ng pagbisto an maikokonsederar komo milestone asin panalmingan kan dedikasyon kan lokal na gobierno sa pig-aapod na Digital Public Services sa paagi kan mga digital platforms.
Marurumduman, saro an Naga City sa 9 na siyudad sa enterong nasyon na enot na nakareseber kan democracy award para sa digital policy kun saen nagpapahiling ini kan transparency, pag-enkaminar sa mga tawo na magkaigwa nin partisipasyon sa mga isyu kan siyudad.
Dugang pa kan opisyal, an Naga an nangengenot sa paggamit kan digital platforms nin huli ta ginagamit ini sa pagdeliberate nin budget, meetings na nagtataong halangkaw na score sa Naga kun kaya nakareseber ini kan nasambitan ng awards.
Sa ngunyan, pigpromesa na sana kan opisyal na padagos an saindang pagkriar pa nin programa na makakatabang sa bilog na siyudad.
