Pig-inkaminar kan Department of the Interior and Local Government (DILG) an gabos nin local government units (LGUs) sa bilog na nasyon na magsagibo nin komprehensibong pag-audit sa imprastraktura sa parehong pampubliko asin pribadong mga establisyemento tangani matabangan an mga komunidad na magpepreparar sa huma kan makukusog na linog.
Sa sarong pahayag, sinaysay kan DILG na an structural integrity kan mga establisyemento an importante tangani masierto an kasalbaduhan kan publiko asin tangani mabawasan an peligro kan mga kaswalti asin pagkaraot kan ari-arian sa panahon kan darakulang seismic event.
Apwera sa pag-inspeksyon sa mga pangenot na pampublikong pasilidad siring kan mga ospital, eskwelahan, opisina kan gobyerno, asin emergency response center, mawot man kan ahensya na masakop kan mga audit an mga istrukturang pagsasadiri kan pribadong tao.
An DILG kan nakalihis na taong 2024 an nakipagtabangan sa manlaen-laeng ibang ahensya kan gobyerno asin propesyonal na grupo, kabali na an Association of Structural Engineers of the Philippines asin Philippine Institute of Civil Engineers, tangani magbilog nin Harmonized Infrastructure Audit Tool (HIAT).
An HIAT an nagsisirbing sarong standardized framework para sa pagsusuri kan katatagan kan establisyemento asin pagtukoy kan mga potensyal na kaluyahan antes na mag abot an mga sakuna.
Sigun sa DILG, 18 high-risk LGUs sa Metro Manila, CALABARZON, asin Central Luzon, mga lugar na pig aagihan kan West Valley Fault, an sinanay na tangani magsagibo nin infrastructure audits.
Apwera digde, 12 pang LGUs sa National Capital Region asin man 20 sa Cavite na manunutaran sa luwas kan fault corridor an nakakumpleto man kan pagsasanay mantang 10 pang LGUs sa Central Luzon an nilalaomang masunod sa katapusan kan bulan.
Komo parte kan nationwide rollout, an departamento an nagbilog man nin sarong corps kan mga sinanay na coach na binibilog kan mga teknikal na eksperto gikan sa mga propesyonal na organisasyon, mga institusyong pang-akademiko asin mga lokal na gobyerno na nag rerepresenta sa 74 na mga LGU sa bilog na nasyon.
Pig-inkaminar man kan DILG an pakikisumaro kan pribadong sektor sa paagi kan pagtatatag kan Local Infrastructure Learning Hubs sa mga rehiyonal na tanggapan kaini.
An mga hub na ini an masirbing mga sentro kan pagtatarabangan kan mga LGU, mga inhinyero, asin mga eskwelahan tangani suportaran an mga audit team na pinamamayuhan kan mga lokal na punong ehekutibo asin binibilog kan mga opisyal kan establisyemento asin mga opisyal kan pamamayo sa kalamidad
