Binalaan ng Department of Migrant Workers (DMW) ang mga Pilipino laban sa paggamit ng Australian visitor visa para magtrabaho, dahil maaari itong humantong sa deportasyon at iba pang malulubhang parusa.
Ayon sa abiso ng DMW, ang Australian visitor visa o Subclass 600 ay para lamang sa maikling turismo, business visits, o pagbisita sa pamilya, at hindi dapat gamitin bilang pamalit sa work visa. Napansin ng ahensya na may ilang manlalakbay na lumalabag sa regulasyon sa pamamagitan ng paggamit ng visitor visa para sa trabaho.
Nagbigay ng matinding paalala ang DMW sa posibleng kahihinatnan ng paglabag sa immigration laws ng host country. Upang maprotektahan ang mga Pilipino, nakikipag-ugnayan na ang ahensya sa Office of Migration Affairs ng Department of Foreign Affairs (DFA) at sa Philippine Consulate General sa Sydney.
Layunin ng hakbang na ito na mas palakasin ang kampanya sa impormasyon upang matiyak na ang mga Filipino nationals ay fully informed sa tamang proseso ng pagpasok at pagtatrabaho sa Australia.
Pinayuhan ng DMW ang mga Overseas Filipino Workers (OFWs) na siguraduhing kumpleto ang mga kinakailangang dokumento bago maghanapbuhay sa ibang bansa. Bilang bahagi ng kanilang mandato, tiniyak ng ahensya ang pagpapabuti ng kanilang serbisyo upang mas maprotektahan ang kapakanan ng mga manggagawang Pilipino.
