Pigsierto kan Department of Health na nakapreparar an mga ospital sa nasyon tangani akuon ano man na klase nin emergency cases na may kinaraman sa matinding init ngunyan na panahon nin Holy Week.
Sigun ki Health Secretary Teodoro Herbosa na nasa code white na an gabos nin pampublikong ospital sa nasyon. Kabali sa pinaglalaomang mga emergency cases iyo an heat stroke asin dehydration, asin man pagkalamos.
Pig abisuhan ni Herbosa an publiko na importanteng imantinir na protektado an sadiri kontra sa matinding init.
Sa mga maglilibot soboot sa manlaen-laeng simbahan para sa visita iglesia, mapasiring sa mga beach o mamamasyar sa manlaen-laeng tourist destinations ngunyan na panahon nin semana santa asin bakasyon, sinabi ni herbosa na dapat pirmeng hydrated o pirmeng nag iinom nin tubig, dae gayo na magpaka-babad sa matinding sikat nin saldang, asin magsilong.
Enkaso man na makamati soboot nin kakaiba sa lawas siring na sana kan matinding pagkapaha, makakamarhay soboot na mag inom nin tubig, enkaso man pighihinang nin malipot, magsilong o magpasiring sa malipot man na lugar o may airconditioned unit tangani magihawahan asin malikayan na mapuli ini sa fatigue o heat stroke.
Pagirumdom ni Herbosa mas marikas makarekober an lawas kun maaagapan an pagsimbag sa siring na mga klase nin pagmati, karaniwan soboot na tinatamaan nin siring na emergency situation iyo an mga may edad na, mga aki asin mga may commorbidity.
