Inapod kan Department of Justice (DOJ) na “insincerity and complacency” an hiro asin pahayag kan kontrobersiyal na kontraktor na si Cezarah “Sarah” Discaya makalihis kaining magpahiling nin finger heart sign asin magsuba sa media mantang pig-iimbestigaran katakod kan anomaliya sa flood control projects.
Sa video mahihiling an pag-abot ni Sarah sa DOJ para sa case build-up kun saen nakuanan si Discaya na nagpapahiling nin finger heart sign sa media.
Pagluwas kaini, pasuba pang sinabi kaini sa mga reporter na pagayunon soboot an saiyang memes.
Sigun ki DOJ spokesperson Atty. Jose Dominic Clavano IV, pigsasaalang-alang sa imbestigasyon an inasal ni Discaya asin naglalaom na makikitungo nin marhay asin propesyunal an gabos kan persons of interest sa kaso.
Marurumdumang sinda Sarah Discaya asin an saiyang agom na si Pacifico an nasa irarom kan Witness Protection Program kan DOJ asin presenting nagsusumiter nin aplikasyon tanganing magin state witnesses- sarong lakdang na pwedeng mag-abswelto sa sainda sa mga kasong kriminal asin sibil.
