NAGA CITY – Pigheras kan sarong opisyal kan Department of Trade and Industry-Camarines Sur an mga adbentahe asin disadbentahe kan pagpapautob kan price freeze sa sarong lugar.
Sa entrevista kan Bombo Radyo Naga ki Jay Ablan, Provincial Director kan DTI-CamSur, sinaysay kaini na sa paagi kan pagpapautob nin price freeze mamantinir na abot kaya asin malilikayan an pananamantala kan mga negosyante sa mga residentes orog na sa panahon na kakatapos pa sana kan kalamidad.
Orog na sa siring na panahon kadakol an gastusan kan mga residentes orog na sa pagpapakarhay kan mga harong na posibleng naraot huli sa kalamidad.
An disadbentahe man soboot kaini an baka dae tolos ma lift asin sa oras na dapat nang ibaba an dae na maibaba huli ta naka freeze pa an presyo kan mga barakalon.
Ini huli ta igwa nin mga produkto na nagbababa asin naglalangkaw an presyo.
Huli digdi kaipuhan pa man giraray na hilingon kun paborable pa ba ini sa kunsyumer asin kun dae pa man ini magkakawsa nin pagkalugi sa mga negosyante.
Tinawan duon na sana kan opisyal na sa anuman na oras dapat na ma-avail kan mga konsyumer an tamang presyo kan mga produkto.
