Masirbing associate counsel kan defense team ni dating Presidente Rodrigo Duterte an bagong abogadong naidugang sa nasambitang grupo.
Kan nakalihis na aldaw, Abril 8, kan ipaluwas kan International Criminal Court (ICC) sarong court filing na nagpapahiling na pigkua kan defense team an batikang abogado na si Dov Jacobs.
Si Jacobs an sarong accredited ICC lawyer, asin man eksperto sa international law asin international criminal law. Ini an nagin parte kan defense team kan dating presidente kan Ivory Coast na si President Laurent Gbagbo na dati man na naatubang sa kasong crimes against humanity alagad dae nag haloy ay na-aquit sa Trial and Appeals Chamber kan ICC.
Parte man ini kan defense team ni Mahamat Said Abdel Kani, sarong dating general gikan sa Central African Republic na naaatubang sa manlaen-laeng kaso siring na sana kan war crimes asin crimes against humanity sa international tribunal.
Si Jacobs an nagsisirbing assistant professor kan public international law sa Netherlands asin man nagtutukdo man sa pirang unibersidad sa France.
Kapot kaini an mga nagkapirang degree gikan sa King’s College sa London, Paris I Panthéon-Sorbonne, Paris II Panthéon Assas, Sciences Po sa Paris, asin man sarong doctorate gikan sa European University Institute sa Florence, Italy.
Antes pa ini nagin parte kan defense team kan dating Presidente, enot na ining nagluwas nin opinyon dapit sa nagin pag-arestar ki Duterte.
Kabali sa saiyang pigtuyaw iyo an dae soboot pagkaka-respeto sa karapatan kan dating Presidente sa irarom kan Article 59 kan Rome Statute siring kan pagkakadara kaini sa sarong domestic court, antes na ini inilupad pasiring The Hague asin man dagusang ipinalaog sa detention facility kan international court.
